|
民初粵謳，南音，龍舟 粵韻絃歌
網上朋友電郵提供粵謳三首，謹此致謝。
2018年12月 27 日於 3:58 PM
堂主你好！
我這邊有三首粵謳，摘錄自1920年代的加拿大大漢公報，在芸芸老舊報紙之中已經塵封近百年，希望可以借貴堂之便可公諸同好。
無情水
無情水，不肯返郎舟，睇見悠悠綠水，我就淚珠淹，隻影形單，原本喺惡受，離人心事，無話唔嬲，流水無情，真喺抵咒，想到送君南浦，我又苦煞心頭，可憐恩愛，唔長久，唉，眉皺皺，傷心唔講得出口，水呀，你只曉得撩人淒絕，乜事總不曉得替我擔愁。
心裡事
心裡事，點講得過人知，縱使人唔疑我，我亦要自家疑，漂泊在呢一處場中，稱乜野本事，雖則話可以欺人，早把自己欺，呢一個鐘情待我，理乜人哋唔鐘意，我做到而家，應分想住下哥，青樓好景，不過喺眼底繁華地，事過情遷，你話有乜所依，所以我顧不得人家，要顧住自己，唉，愁悶起，到底何時止，一則惱恨埋堆，一則惱恨別理。
須要睇透
須要睇透，呢一盤棋，錯移一步，就會失了先機，趁此士氣咁齊全，其卒又咁奮起，過河車馬，亦任左右驅馳咁，就要一眾顧住亞公，唔比有中宮砲至，免被佢將軍咒督，亦都唔知，我勸你哋咪貪勝一時，就唔去我避，須謹記，橫棋高丈二，至怕攪到滿盤錯亂，個陣就難以維持。
讀者 霆
|
|||||||||||||||||||||||||||||||||||||||||||||||||||||||||||||||
