民初粵謳南音龍舟

民初粵謳，南音，龍舟 粵韻絃歌

粵謳多情月招子庸輯本
多情月，掛在畫樓邊。你照人離別，又似可人憐。人在天涯，你妹心隔一綫。萬里情思，兩地掛牽。我日日望君，君呀唔見你轉變。雙魚無路，把書傳。月月係咁月圓，你妹經看過幾遍。你在他鄉，曾否盼妹嬋娟。我想出路與及在家，都係同一樣掛念。唉，偷偷自怨，願郎你心事莫變。到底能相見箇陣，花底同君再看過月圓。

粵謳無情月招子庸輯本
無情月，掛在奈何天。相思嫌月，照住我孤眠。月呀，你有缺時，還有復轉，做乜我郎一去，得咁心堅。哀求月老為我行方便，照見我郎試問一句，睇佢點樣子回言。若是佢心歪唔紀念，叫佢手按住良心，睇下吓天。做人唔好，做得咁心肝變。你唔記如今，亦都記吓在前。為郎終日腸牽斷，叫我點能學得箇箇月裡嬋娟。捨得相逢學月，敢易見箇無情面。我唔怕路遠，定要去到問明佢心事見點。免使虛担人世，呢段假意姻緣。

粵謳天邊月招子庸輯本
天邊月，似簾鈎。泛在長江任去留。月呀，你有團圓，人自會等候。總係眼前虧缺，恨難收。我想人世咁長，唔得咁就手。大抵好極人生，都有一樣愁。你睇文君新寡，重去尋佳偶。班姬團扇尚悲秋。唉，心想透。待等八月中旬候。月呀，總有一箇團圓，却在後頭。

粵謳樓頭月招子庸輯本
樓頭月，掛在畫欄邊。月呀，做乜照人離別，偏要自己團圓。學你一月一遍團圓，你妹重唔係乜願。何况天涯遙隔，愈見心酸。人話好極都要丟開，唔好咁綣戀。大抵久別相逢，重好過在前。雖則我心事係咁丟開，總係情寔在惡斷。第一夜來重難禁得夢魂顛。我想死別生離亦唔差得幾遠，但得早一日逢君，自願命短一年。天呀，雖乃係好事多磨，亦該留我一綫。唉，做乜唔得就算，不若當初唔見面。免得我一生遺恨，月呀，你對住我長圓。

粵謳孤飛雁招子庸輯本
孤飛雁，驚醒獨眠人。起來愁對月三更。担頭細把征鴻問，你欲往何方，得咁夜深。雌雄有伴，你便跟應跟，呢陣影隻形單，問你點樣子去尋。我地天涯人遠難親近，有翼難飛，去爪得佢親。無計夢中，尋到薄行，又俾你哀聲撩醒，未講得幾句時文。捨得帶佢一紙來，我亦唔捨得把你怨恨。累得我醒後無書，夢裡又別君。意欲話好夢可以再尋，我還向夢穩。又怕茫茫烟水，渺渺無憑。唉，真正肉緊，淒凉誰見憫，呢陣衡陽聲斷，問你點覔同羣。

粵謳傳書雁招子庸輯本
傳書雁，共我帶紙書還。唔見佢書還，你便莫箇番。今日不見書回，大抵佢心事都有限。抑或你帶書唔仔細，失落鄉關。縱使佢愁極寫書心事懶，有書唔寄，你便達一紙空函。等我一張白紙，當佢言千萬。二人心照，盡在不言間。呢陣不見回書，空見雁還。唉，雁罷雁，你亦不必傳書柬。等我照樣不回書信，你便去見箇箇薄情男。

粵謳多情雁招子庸輯本
多情雁，一對向南飛。雁呀，秋風何苦重咁遠飄離。你在江湖留落，尚有雌雄侶，虧我影隻形單異地棲。風急衣單無路寄，寒衣做起誤落空閨。日日望到タ陽，我就愁倍起，只見一圍衰柳鎖住長堤。又見人影一鞭殘照裡，幾回錯認，是我郎歸。唉，我思想起，想必紅塵擔誤了你。點得雲斂風晴共你際會期。

粵謳花有淚招子庸輯本
花有淚，月本無痕。月呀，你照見我地花容，瘦有幾分。可惜月呀，你有圓時，我地花總係會褪。就俾你桂香輪滿，都係有影無根。我想花信不過二十四番，容乜易盡。遇著風狂雨驟，就敢(咁)斷送了我終身。個陣你在九霄雲外，縱有心相印。總係東西尋逐，點顧得我地墜溷飄茵。莫謂過眼烟花無乜要緊，獨惜被人攀折，未免想起吓來因。個陣雲路係咁迢遙，我亦知相託都冇分。唉，心不忍，試把嬋娟問。問你廣寒宮有幾闊咯，點塟(葬)得咁多冇主花魂。

粵謳容乜易凡六招子庸輯本
手抱琵琶百感悲，做乜老來情事總不相宜。青春一去難提起，提起番來苦自知。一向痴迷，唔肯料理，今日鏡中顏色，自見嫌疑。人話風流老大還堪恃，試睇菊殘猶有傲霜枝。身世係咁飄蓬，重爭乜硬氣，好似水流花謝，渺渺無期。相思萬種從今止，無的味，嘆聲容乜易，等我帶淚和情，訴吓舊時。

容乜易，過在青樓。歌舞歡場事事休。薄命紅顏天注就，減低情性學吓温柔。至此春烟迷住章臺柳，在佢三起三眠，總不愧羞。往日迎新，今日送舊。蝶愛尋香點自由。只估買斷青春拏住手，綠雲深鎖不知秋。再冇話楊花，重曉得去憐身後。心想透，恰被風拖逗。敢(咁)就化作浮萍逐水流。

容乜易，醉酒千盅。情有咁深時，味有咁濃。我想冤家，必定係前生種。種隱情根，不肯放鬆。酒邊都要人珍重，莫話魂迷心亂，兩下交融。大抵歡場過眼渾如夢，席散人歸萬事空。遞盞傳杯心事重，問你面上桃花有幾耐紅。今日霞觴滿酌，唔知憑誰共。唉，中乜用，未飲心先痛。一生遺恨，誤入花叢。

容乜易，放柳邊船，木蘭雙槳載住神仙。東風為我行方便，吹得情哥到我面前。鴛鴦共宿人人羨，好似兩顆明珠一線穿。滿意東君常見面，今生還結再生緣。正係藕絲縛住荷花片，一體同根有乜變遷。唔想帆影就隨湘水轉。難遂願，線緊風箏斷。虧我流落在呢處天涯，寔在可憐。

容乜易散，彩雲飛。春帆頃刻，就要分離。誰人肯願分連理，事到其間，點樣子設施。早知割愛唔輕易，何苦當初一力護持。今日送別無言惟有淚，離人折盡柳千枝。長亭自古傷心地，你話後會何曾有定期。紈扇預防秋後棄，唉，嗟命鄙，風流雲散易。箇陣欲捨難分，恨亦已遲。

容乜易老，鬂蒼蒼。關心誰記，往日珠娘。秋風陣陣添惆悵，白滿船頭一夜霜。四條絃澁難成響，總係彈到情深，怕惹恨長。淪落幾人同我一樣，不記起從前，就不會慘傷。好花畢竟成飄蕩，叫我怎能禁得，箇的蝶浪蜂狂。此後我孤零無乜依向，唉，低自唱，還了風流賬，虧我手抱琵琶，悶對斜陽。

粵謳水會退招子庸輯本
水會退，又會番流。水呀，你既退又試番流，見你日夜不休。臨行自古話難分手，做乜分手到如今，又在別處逗留。大抵人世相逢，都憑個氣候。花行春令，月到中秋。當初慌久情唔透，一講到情深，總不顧後頭。在我都話會少離多，情重厚，唉，君你想透，若係日日癡埋，點做得女牛。

粵謳想前因招子庸輯本
煩過一陣，想起吓前因。此生何事，墮落紅塵。我想託世做到女流，原係可憫。况且青樓女子。又試斷梗無根。好極繁華，不過係陪酒箇陣。等到客散燈寒，又試自己斷魂。有客就叫做姑娘，無客就下等。一時洽淡，把我作賤三分。或者遇着人客有情，都重還有的倚凭。怕箇的無情醉漢，就係攞命災瘟。大抵箇日落到青樓，就從箇日種恨。唉，總係由得我著緊啫，總要挨到淚盡花殘，就算做過一世人。

粵謳點清油招子庸輯本
清油半盞，點着幾條心。君呀，你心事咁多時叫我點樣子去尋。睇你心頭咁猛，亦都唔禁浸。你試睇吓個盞清油，尚有幾深。恐怕越浸越乾，油重越緊。點似得心少油多，漫慢斟。你唔怕我(口言替合為一字)，莫學無人恨。你重要剔起心頭，正做好人。

粵謳對孤燈招子庸輯本
斷腸人怕對孤燈。對影孤寒，想吓就斷魂。呢陣衿枕咁孤單，無乜倚凭。影呀，你無言無語，叫我苦對誰伸。雖則共你成双，亦難慰得我恨。不若把杯同影，共作三人。愛只愛你生死不離，咁跟得我緊。就係天涯海角，你我都難分。君呀，大抵呢陣銀燈獨對心相印，恨只恨我隻影雞隨，共你酌斟。願你對影暫將魂魄認，唉，心不忿，夢寐難親近。當作挑燈長見我，切勿對影傷神。

粵謳船頭浪招子庸輯本
船頭浪，合吓又分開。相思如水，湧上心來。君呀，你生在情天，奴長在慈海。碧天連水，水與天挨。我地紅粉點似得，青山冇變改。你睇吓水面個的殘花，事就可哀。似水流年，又唔知流得幾耐。須要自愛，許你死後做到成仙成佛，亦未必真正自在。罷咯，不若及時行樂，共你倚遍月榭風臺。

粵謳多情柳凡二招子庸輯本
多情柳，贈俾薄情夫。夫呀，分離二字，問你可憐無。一心只望你唔虧負，兩存恩愛，水遠山高。點想共你無緣，敢就分拆在半路。呢陣煙水雲山，阻隔路途。做女箇陣，點知離別得咁苦。唉，真正可惱，呢會衷情，都係憑柳你代訴。故此咁遠致到得呢處離亭，我亦不憚勞。

多情柳，淚眼双双。柳呀，做乜見人快活，見我就淒涼。你種在灞橋，就知道你係冤孽賬。送人歸去，淨對住個對宿水鴛鴦。柳呀，你弱質咁難扶，都係同我一樣。春風唔怕，怕捱到秋霜。今日形容咁枯槁，似極無依傍。唉，唔好異向，到頭終有望。自古新荑還只望佢再發枯楊。

粵謳烟花地招子庸輯本
烟花地，是邪魔。有咁多風流，就要受咁多折磨。雪月風花，我亦曾見過。無限風流，問你買得幾多。只可當渠係過眼烟雲，若係癡就會錯。恐怕鑿山難補，箇的冇底深河。若講到真義真情，邊個共你死過。總怕金盡床頭，好極都要疎。大抵花柳害人，非獨一個。唉，須想過，好息心頭火。普勸世間人仔，莫誤結箇段水上絲籮。

粵謳聽哀鴻招子庸輯本
斷腸人，怕聽哀鴻。驚散姻緣在夢中。雁呀，你係咁孤鸞，奴咁寡鳳。你哀殘月，我獨對燈紅。可惜你一世孤單無侶共，我地天涯人遠，重話有信息相通。雁呀，我共你同病相憐，你便將我書信遠送。你莫向江關留戀，阻滯行踪。我望雁好比望郎，心事更重。愁有萬種。雁呀，你莫學我情郎身世，只係斷梗飄篷。

粵謳分別淚凡三招子庸輯本
分別淚，莫洒向離人。離愁未講，已自難禁。邊一箇唔知到，行路咁艱難須要謹慎。總係臨行箇一種說話，要先兩日，向枕畔囑咐殷勤。若係臨時提起，就會撩人恨。不若强為歡笑，等佢去得安心。自願大大哭過一場，或者消吓怨恨。哭到箇一點氣難番又向夢裡尋。夢裡見着箇箇多情，就要安慰佢一陣。細把行蹤問。首先唔好向佢講到，半句苦楚時文。

分別淚，繳極都唔乾。淚呀，人有人地牽情，使乜你咁着忙。相思滿腹，唔知憑誰講。講極過人知，都冇箇為我慘傷。頃刻車馬就要分開，點得疎林將就吓，為我掛住斜陽。唉，心想愴，風笛吹離况。君呀，你前途咁辛苦，都要謹慎吓行藏。

分別淚，轉眼又番場。君呀，捨得你學我眼淚咁易回頭，使乜我咁慘傷。今日別期未了，就把歸期望想。想到一自自孤寒，叫我怎不斷腸。意欲忍淚暫歡，同你細講。虧我淚流不斷，好似九曲湘江。點得眼淚送君，好似河水一樣。水送得到箇方時，我淚亦到得箇方。君呀，你見水好似見奴，心莫異向。須念吓我地枕邊流淚到天光。我双淚盡地落到君前，你便為我分吓苦况。就俾你共我分開流淚，都係見淒涼。心想愴，別後心難放。總係你學我望郎咁心事望我，就不會掉轉心腸。

粵謳無情語招子庸輯本
無情語，勸不轉君身。眼底天涯萬里人。粧台春老，重有誰憐憫。客邸無花，又算一春人。話路頭花柳，最惹得人憐憫。君呀，你莫尋漁父，去問武陵津。雖則過眼烟花，無乜要緊。你便安吓本分。乃念双親長念你，都係箇一點精神。

粵謳無情眼招子庸輯本
無情眼，送不得君車。淚花如雨，懶倚門閭。一片真心如似白水。織不盡迴文，寫不盡血書。臨行致囑無多語。君呀，好極京華，都要念吓故居。今日水酒一杯，和共眼淚。君宜扶醉，你便放歡心共我談笑兩句。重要轉生來世，共你做對比目双魚。

粵謳無情曲招子庸輯本
無情曲，對不住君歌。綠波春水奈愁何。好鳥有心憐憫我，替我聲聲啼喚，捨不得歌。今日留春不住，未必係王孫錯。雁塔題名，你便趁早一科。我想再世李仙無乜幾個。休要放過。今日孤單誰識你係鄭元和。