|
民初粵謳，南音，龍舟 粵韻絃歌 南音 國民嘆五更(傷辰丸案也) 偷自想，淚汪汪。虧我國權不振，漸淪亡。試睇中國近來，何現象。利權坐喪足深傷。當此春風似剪，我就添惆悵。觸起許多愁緒，暗地淒涼。記得辰丸被獲 ，個陣風潮漲。有咁大嘅案情，該有主張。雖則話强弱相形，須自量。總要堅持公理，咪怕佢國力豪强。可恨外部個班人，一味甘退讓 。糊塗了結，不顧後日災殃。今夜月華對住，我就心悽愴。唉，無可望，不若把五更來嘆，訴吓呢段情長。 初更月，照窗前。誰人不愛，個月裡嬋娟。月呀，見你出自東方，光一片。團圓到極地，確是可人憐。月係咁清明，就該同我打算。做乜當頭見你 ，越覺心酸。惹起國仇家恨，心就唔知點。好似滿胸悲憤，有口難言。我四萬萬同胞，如蟻賤。你照臨中土，要替佢呼冤。試睇土地瓜分，唔差得幾遠。國權喪盡，係釋放二辰丸。高高在上 ，不共我行方便。枉你自號無私，照遍大千。呢陣講盡幾多言語，你又詐作唔聽(平)見。唉，愁不淺，虧我悠悠長夜，係咁遲眠。 二更後，月輪高。月呀你知否我國民受酷，似坐監牢。花月有咁鮮妍，雖則係好，可惜賞花對月，要讓別個風騷。我只見月影無聊，心更惱，最唔禁想 ，係中國嘅前途。月自清華，人自苦，你睇官場慘毒，好似地暗天烏。話我民氣囂張，多昧冒，無端白事，向政府嚟嘈。重話查察起事之人，把佢來拘捕 ，剝削吾民，重慘過利刀。事恃威權，撩動眾怒，一己甘為矢的，確是胆生毛。壓制到咁交關，無路可訴。坐令(平)民氣死難甦。咁樣點怪我華人，常受侮，唉，愁滿肚 ，一言難盡吐，呢陣我傷時感事，月你知無。 樵樓鼓，又打三更。我試把神州悵望，就涕淚飄零。堂堂萬里中華境，國富兵强，理所應(平)。地脈係咁豐腴，財產又咁裕盛，况且最先開化 ，胄衍神明。做乜受人苛待，唔知警，好似牛羊，任宰烹。若使政府為民，能請命，駛乜垂頭喪氣，日受欺凌。點想佢白鬚紅頂，已成了盲聾病，熱血全無冷似冰。人地强橫 ，佢就唔敢逆命，一張照會，就事事應承。何况外人窺透，我地難爭競，强權恫喝唱虛聲。月呀，你暗了復明，還有的好境，唉，我愁相並，點得共月你團圓千古 ，大放光明。 四更鼓，亂紛紛。虧我叫天唔應(仄)，叫地唔聞。只見夜靜天高，明月近，人聲寂寞剩孤燈。大局如斯真可憫，不惟國弱，更重民貧。枉我緬懷時局 ，千般憤，後顧茫茫，點斷得禍根。你睇山河大地，不絕風潮滾，志士空餘血淚痕。交涉已成千古恨，瓜分慘劇，係此原因。早知失敗，咪自撩人憤，國權斷送，點對得我地同羣。今夜我坐不成眠 ，試將月問，問明月你呀，始得安心。無奈月你總係唔聲，情似太忍，唉，心點忿，大局危危震。聽見銀壺玉漏，更易銷魂。 五更天色，夜將闌。回首中原淚暗潸(平)。更長已覺愁無限，想起為人奴隸，越覺心煩。今夜對月無聊，惟有自歎，枉費我盈腔熱血，只為(仄)時艱 。中原大局，已是將糜爛，問誰隻手可挽狂瀾。只望我漢族同胞，齊合胆，文明對待，記在心間。結聯團體，咪自如沙散，切戒野蠻暴動，被人彈。只在吾民求自反，若向官場倚靠 ，不過係冰山。今日補牢還未晚，唉，除後患，要把民權挽，個陣雄雞一唱，就聲震人寰。
|
||||||||||||||||||||||||||||||||||||||||||||||||||
