|
粵謳 又試呷醋 又試呷醋，究竟為乜來因。你的刁喬扭擰，實係不同人。往日共你温埋唔止一陣。時時將就你。故此得咁噤温。白水斬盡幾十萬金錢，還當我做老襯。一時唔合意 ，重要鬧我白霍沙塵。人地話你定性冇厘，我心就算緊。總係入了迷魂陣裏，有氣難呻。記得當日餞別長亭，你將淚抆。都重話情難割愛，叫我書寄頻頻。個陣共嬌你分離，我心重似不忍 。想到青樓薄倖，又不敢盡信你情真。况且你重有温佬同行親貼近。我縱萬千情緒，亦不過寫書陳。虧我酒債未償難戒引。逼住知心尋個，棄舊憐新。點估你醋味咁深情不近 ，滬江迢隔尚且鼓舌搖唇。我今日聽見此話傳來心就憤。難再忍。掟煲乘此陣。免你又至開刀來試，係處貢媚舒顰。 粵謳 亡國在即 亡國在即，重有乜心機。從此苦海沉淪，冇乜了期。一味做人奴隸，要受人氣。莫想仰首伸眉，論列是非。若是不甘亡國，就要齊心起。執戈殺敵，拚把頂踵皆糜。就算犧牲身命，都算有點英雄氣 。何所畏忌。對得先人起。好過做異族家奴，任得佢亂噬擇肥。 (對日抗戰時佳作) 粵謳 春已暮 春已暮。送春歸。春歸何處，實不消提。我地國家多難，正在愁眉際。還要加上春愁，實覺慘悽。春你便帶得愁去，莫個還延滯。等我一壺春酒，便送你出長堤。雖則有限韶華，悲似水逝 。還不計。春去愁同逝。我便可以振起精神，大有作為。 粵謳 桃花扇 桃花扇，寫首斷腸詞，寫到情深扇亦慘悽。命冇薄得過桃花，情冇薄得過紙，紙上桃花薄，更不知。君呀，你既寫花容，先要曉得花的意思，青春難得，莫誤花時。我想絕世風流都冇乜好恃，秋風團扇怨在深閨。寫出萬葉千花都為情一個字，唔信你睇侯公子，李香君，唔係情重點得遇合佳期。
|
